Кондак 1

Взбранный Царя Небеснаго служителю и великий Церкве Христовы святителю, правыя веры исповеданием во всем мире просиявый, велие имеяй дерзновение ко Святей Троице, от всяких нас бед ограждай, со умилением тебе вопиющих:

Радуйся, Василие, великий иерарше, Православия всемирный светильниче.

Икос 1

Ангелов Творец, от века предызбравый тя, преблаженне отче Василие, быти великаго светильника Церкве Своея, ангелоподобна житием яви тя: вельми бо богомыслием и пощеньми в пустыни подвизався, на высоту добродетели восшел еси. Темже, велию на небесех славу стяжавый, приими от нас смиренных, восхваляти тя дерзающих, сия хвалебныя глаголы:

Радуйся, Василие, царствия тезоименитый; радуйся, иерарше Христов великий.

Радуйся, Церкве непоколебимый столпе; радуйся, рода святаго пречестная отрасле.

Радуйся, от юности Царю Небесному всеусердно служивый; радуйся, всею земною, наипаче же небесною, премудростию ум свой обогативый.

Радуйся, купно со другом твоим Григорием Богословом в любомудрии преуспевавый; радуйся, учителя твоего Еввула премудрыми словесы ко Христу обративый.

Радуйся, чистоты и целомудрия предивный хранителю; радуйся, ко спасению верный путеводителю.

Радуйся, душепагубных ересей разорителю; радуйся, богомудрый вселенныя учителю.

Радуйся, Василие, великий иерарше, Православия всемирный светильниче.

Кондак 2

Видя Церковь Христову арианским зловерием обуреваему, и Божию призванию повинуяся, изшел еси, преподобне отче, из пустыни, юже возлюбил еси, во град Кесарию, идеже благодать священства восприял еси и во архиепископа поставлен был еси, слово спасения велегласно всем концем земли благовествуя, верныя же по вся дни поучая Богу, Создателю всех, достойно воспевати: Аллилуиа.

Икос 2

Разум верных боговедением просвещая, святителю Христов Василие, естество сущих изъяснил еси, и Бога невидимаго в творениих руку Его познавати научил еси. Темже и мы, твоими богомудрыми ученьми просвещаемии, взываем сице:

Радуйся, познанием Бога, в шесть дний вся сотворша, верныя озаривый; радуйся, дивныя дела Его достойно восхваляти научивый.

Радуйся, палато мудрости преукрашенная; радуйся, сокровищница богословия преизобильная.

Радуйся, яко тайны премудрости Божия во всем мире видети научал еси; радуйся, яко и в малых вещех величие Божие зрети наставлял еси.

Радуйся, света первозданнаго красоту живописавый; радуйся, твердую силу перваго глагола Божия во вселенней показавый.

Радуйся, былием травным скорую гибель славы земныя изобразивый; радуйся, во благолепии светил небесных Солнце Правды Христа зрети указавый.

Радуйся, трудолюбием малой твари от лености людей отвращавый; радуйся, человеку, царю тварей, над страстьми царствовати повелевавый.

Радуйся, Василие, великий иерарше, Православия всемирный светильниче.

Кондак 3

Силою Всевышняго укрепляемь, отче святый Василие, противоборствовал еси богоотступнику Иулиану, и злое его на христианы умышление разрушити умолил еси Господа и Пречистую Его Матерь, да вси Единому Богу благодарно поют: Аллилуиа.

Икос 3

Имеяй ревность велию по Бозе Вседержителе и меч слова Его в руце восприим, плевелы языческаго Иулианова нечестия скоро посекл еси, верныя же во благочестии утвердил еси; научи и нас, преподобне отче, единому точию Богу чистым житием служити, зовущих ти сице:

Радуйся, гордаго Иулиана в богоотступстве мужественно обличивый; радуйся, христоненавистныя его начинания разрушивый.

Радуйся, молитвою слезною, яко копьем, того поразивый; радуйся, скорую его погибель предвозвестивый.

Радуйся, люди Божия, якоже Моисей древле Израиля, от идолослужения свободивый; радуйся, плевелы нечестия истребивый.

Радуйся, пищею словес Божиих верныя изобильно насытивый; радуйся, струями благодати сердца напоивый.

Радуйся, скрижали велений Христовых твердо содержати увещевавый; радуйся, учение уст твоих житием утвердивый.

Радуйся, рабе благий и верный; радуйся, делателю вертограда Христова усердный.

Радуйся, Василие, великий иерарше, Православия всемирный светильниче.

Кондак 4

Бурю ярости царя Уалента, арианским зловерием одержима, ты, святче Божий, силою Духа в тебе живуща, утишил еси, и мир Церкви Святей даровал еси, святыми трудами твоими и теплыми к Богу молитвами Емуже радуяся воспел еси: Аллилуиа.

Икос 4

Слышав злочестивый Уалент, яко ты, иерарше Божий, во истине стоиши, и вси вернии гласу твоему повинуются, восхоте от правыя веры тя отвратити; сего ради посла к тебе епарха своего Модеста, послежде же и сам прииде в Кесарию. Но ты, богоносе отче, ни гнева царева, ни прещений грознаго его воеводы не устрашился еси; мы же, прославляюще сицевое твое твердое исповедание, вопием ти:

Радуйся, поборниче правыя веры непоколебимый; радуйся, пастырю, душу за верныя положити готовый.

Радуйся, твердое исповедание Петрово показавый; радуйся, Илиину ревность о славе Святыя Троицы явивый.

Радуйся, гнев царя нечестиваго боголепием священнослужения утишивый; радуйся, богомудрыми словесы уста зловернаго воеводы заградивый.

Радуйся, яко прещения изгнанием и муками не убоялся еси; радуйся, яко и смерть за Христа восприяти желал еси.

Радуйся, гонение за веру претерпевый; радуйся, скорбьми многими в радость Господа вшедый.

Радуйся, истину Христову пред цари и владыки небоязненно вещавый; радуйся, вернаго служителя Царя Небеснаго твердым исповеданием себе показавый.

Радуйся, Василие, великий иерарше, Православия всемирный светильниче.

Кондак 5

Боготечная звезда явился еси, святителю Христов Василие, пресветлыми милосердия лучами нощь скорбей мрачную осиявающая, мглу бед отгоняющая, и всем, в море жития бурном плывущим, путь верный к Царству Небесному показующая, да вси спасающему Богу радующеся поют: Аллилуиа.

Икос 5

Видевше вси тя, святителю Божий, яко отца чадолюбива, в напастех и скорбех от тебе помощи усердно искаху; ты же о всех милосердовал еси, образ веры истинныя в себе сим показуя. Буди, преблагий отче, скорый помощник и нам, грехми и скорбьми обуреваемым, с любовию ти вопиющим:

Радуйся, светильниче любве, от Христа возсиявый; радуйся, Отцу Небесному в милосердии подражавый.

Радуйся, неимущих богатое сокровище; радуйся, в нуждах верное прибежище.

Радуйся, гладныя, якоже Иосиф древле, препитавый; радуйся, многи обители бездомным и убогим в Кесарии основавый.

Радуйся, прокаженных раны своима рукама, яко самарянин добрый, врачевавый; радуйся, гонителя твоего Модеста недугующа исцеливый и от народныя казни того избавивый.

Радуйся, вдовицу убогую от обиды епарха защитивый; радуйся, жене грешнице прощение грехов у Бога испросивый.

Радуйся, сирот отче и страждущих утешение; радуйся, во гресех погибающих вразумление и исправление.

Радуйся, Василие, великий иерарше, Православия всемирный светильниче.

Кондак 6

Проповедник всему миру истины Христовы явился еси, святителю отче Василие, силою благодатною слова твоего, яко острием меча, греховная сердца проницаяй и к покаянию возбуждаяй, да вси чистым сердцем Троице Святей поют: Аллилуиа.

Икос 6

Возсиял еси на тверди церковней, яко великое светозарное светило, отче Василие, всю поднебесную разумением веры истинныя просвещающее, мрак же страстей греховных отгоняющее, от нихже и нас свободи, зовущих ти сице:

Радуйся, Троицы Святыя верный служителю; радуйся, таин веры богоозаренный изъяснителю.

Радуйся, яко Отцу Сына Единосущна и Духа сопрестольна велегласно проповедал еси; радуйся, яко истину о Свете Превечном, от Света Превечна просиявшем, верным изъяснил еси.

Радуйся, Господа Спасителя, яко Бога воплощенна и Творца всех век исповедавый; радуйся, таинство двух естеств и единой Ипостаси во Христе Бозе показавый.

Радуйся, силою царственнаго слова твоего богатым житницы открыти повелевый; радуйся, от корысти неправедныя многи учением отвративый.

Радуйся, душепагубное пиянство словом, яко громом, поражавый; радуйся, жестокосердие и зависть из сердец истреблявый.

Радуйся, воздержания ревнительный наставниче; радуйся, покаяния неумолчный проповедниче.

Радуйся, Василие, великий иерарше, Православия всемирный светильниче.

Кондак 7

Хотя верныя от соборищ арианских оградити, ты, святче Божий Василие, вся в церкви благоукрасил еси, и чин умилительный Божественныя Литургии мудре сложил еси, многи же молитвы, яко миро благовонное, от уст твоих огнедохновенных излияшася, имиже во гресех прощения себе и усопшим братиям просим, Троицу же Пресвятую славим, поюще: Аллилуиа.

Икос 7

Новаго Аарона вернии зряху в тебе, отче святый Василие, егда боголепно Жертву Безкровну священнодействовал еси, даровании Святаго Духа, яко многоценными каменьми светящеюся одеждою, украшен. Ныне же в вышнем жертвеннице о Церкви предстательствуяй, поминай выну и нас, тебе умиленно зовущих:

Радуйся, архиерею Божий, преизобильную, якоже и Аарон, благодать священства восприявый; радуйся, велие дерзновение в молитве за люди стяжавый.

Радуйся, таин Божиих мудрый строителю; радуйся, чина церковнаго благоукрасителю.

Радуйся, служению Литургии от Самаго Христа, якоже и Иаков апостол, наученный; радуйся, молитвенниче, Духом Божиим озаренный.

Радуйся, небесным светом, якоже нецыи видеша, в служении осияваемый; радуйся, Ангелы, яко некиими пресветлыми мужами, окружаемый.

Радуйся, яко твоею первее молитвою к восприятию Таин Христовых себе уготовляем; радуйся, яко твоими словесы в вечер Пятидесятницы коленопоклонная прошения возсылаем.

Радуйся, Кесарийскаго святительскаго престола славо и украшение; радуйся, яко иереом всея Церкве подаеши от Бога благодатное в служении укрепление.

Радуйся, Василие, великий иерарше, Православия всемирный светильниче.

Кондак 8

Странное и преславное видение открыся о тебе, святителю Василие, преподобному Ефрему Сирианину: единожды бо показа ему тя Бог, яко столпа огненна, высоты небесныя досязающа, послежде же, пришед в Кесарию, преподобный узре тя огненным языком люди поучающа и умиленно возопи Богу: Аллилуиа.

Икос 8

Весь светом небесным серафимския любве пламенел еси, богоносе Василие; словеса бо твоя беша, яко молния, ереси попаляющая, души же верных пламенем веры и любве просвещающая; даждь убо и нам, отче, молитвою твоею, искру хотя малую твоея любве имети, зовущим сицевая:

Радуйся, пламеновидный столпе, ереси попаляяй; радуйся, огнь веры истинныя и любве нелицемерныя возгреваяй.

Радуйся, лжи Ариевы ереси твердый обличителю; радуйся, истины Христовы пламенный ревнителю.

Радуйся, яко гордаго Евномиа, Сына Божия хуливша, посрамил еси; радуйся, яко Македониево хуление Духа Святаго препрел еси.

Радуйся, суемудрия Несториева разорителю; радуйся, чести Пресвятыя Богоматере усердный защитителю.

Радуйся, пастырю, небесным блистанием любве осияваемый; радуйся, учителю веры, словеса молниеносная вещавый.

Радуйся, богонасажденная маслино, многих святых Церкви произведшая; радуйся, лозо, богомудрых Православия поборников израстившая.

Радуйся, Василие, великий иерарше, Православия всемирный светильниче.

Кондак 9

Все еретическое соборище не возможе противостояти благодатней, яже в тебе, святый отче, обиташе, силе; юношу бо некоего, во власть сатаны впадша, силою молитвы твоея от сетей вражиих отъял еси, покаявшася же ко Христу возвратил еси, благодарно поя Спасителю Богу: Аллилуиа.

Икос 9

Витийством богодухновенным твоим, святителю Василие, побеждаемии и видевше преславное на юноше бывшее чудо, мнози от еретик ко единей присоединишася Церкви, еяже верными и послушными чадами и нас быти сподоби, зовущих ти сице:

Радуйся, вся концы земли небесным учением осиявый; радуйся, благодатию Христовою темныя силы ада побеждавый.

Радуйся, юношу от сетей сатаны свободивый; радуйся, Телом и Кровию Христовою того насытивый.

Радуйся, яко душе, Кровию Христовою искупленней, погибнути не дал еси; радуйся, яко, в погибельный грех впадша, юношу простити Христа умолил еси.

Радуйся, яко преславным чудом люди удивил еси; радуйся, яко обращением заблуждша Ангелы возрадовал еси.

Радуйся, просити у Господа Ангелов ограждения нас научаяй; радуйся, Ангела Хранителя молитвою твоею к нам приближаяй.

Радуйся, от наветов вражиих свободителю; радуйся, во искушениих скорый защитителю.

Радуйся, Василие, великий иерарше, Православия всемирный светильниче.

Кондак 10

Спасти хотя Творец Свое словесное создание, показа тя твердаго верных защитителя, отче Василие, и Церкве Своея хранителя, да свет Православия тобою всему миру явлен будет, и вси вернии благодарне Троице Святей воспевают: Аллилуиа.

Икос 10

Стена еси Церкве, и твердое верных ограждение явился еси, о великий в иерарсех Василие, егда во граде Никейстем врата церковная силою молитвы твоея отверзл еси и истину правыя веры сим явил еси, уста же хулящих имя Христово заградил еси. Нам же, Господа Спасителя православно исповедающим, отверзи, отче, милосердия Божия двери, заступлением твоим, да зовем ти сице:

Радуйся, Ангеле земный, Церкве Христовы хранителю; радуйся, Богом предъизбранный верных защитителю.

Радуйся, врата церковная, якоже Илиа древле небо, молитвою открывый; радуйся, храм святый, еретиками восхищенный, паки верным возвративый.

Радуйся, верных от ересей оградивый; радуйся, Церковь Христову неврежденну от лжеучений сохранивый.

Радуйся, превеликое на небеси имя Христово и на земли чудесы возвеличивый; радуйся, Православие во вселенней утвердивый.

Радуйся, яко тобою гордость нечестивых низложися; радуйся, яко тобою смирение верных вознесеся.

Радуйся, яко тобою вера святая прославляется; радуйся, яко тобою Церковь Христова дивно красуется.

Радуйся, Василие, великий иерарше, Православия всемирный светильниче.

Кондак 11

Пение подобаше возносимо быти тебе с небеси, а не от земли, о пречудный Василие, небес бо явление на земли был еси, к небеси богомудрыми ученьми твоими умы верных возводил еси, и ныне с небес на ны милостиво призираеши и преизобильную всем нам благодать подаеши от Щедродателя Христа Бога, Емуже со Ангелы в небесех выну поеши: Аллилуиа.

Икос 11

Светоносный светильниче, весь многими дарами Божиими и добродетельми сияющ, был еси, святче Божий Василие, имиже и ны просвети, в добродетели настави и ко Царствию Небесному направи, зовущих тебе сице:

Радуйся, Церкве Христовы незаходимое сияние и пресветлое украшение; радуйся, яко подаеши христианом во вся веки в вере правей утверждение.

Радуйся, таланты, Богом врученныя тебе, усовершивый; радуйся, от земныя мудрости вся ко спасению полезная собравый.

Радуйся, сыну цареву во славу правоверия чудесное исцеление даровавый; радуйся, целомудренное житие Анастасиа пресвитера и супружницы его прозревый.

Радуйся, кротко обидящим тя прощавый; радуйся, смирением и терпением клеветы на тя побеждавый.

Радуйся, устав совершеннаго жития иноком учредивый; радуйся, многи иноки в обителех собравый.

Радуйся, правила и каноны и спасительная учения в наследие Церкви оставивый; радуйся, богомудрыми списаньми твоими многоценное сокровище к назиданию христианом даровавый.

Радуйся, Василие, великий иерарше, Православия всемирный светильниче.

Кондак 12

Благодать великую дарова тебе Христос Бог, святителю отче Василие, не точию заблуждшия к покаянию приводити, но и многи неверныя ко Христу обращати; егда бо уже смертно болезновал еси, ко блаженней кончине приближаяся, евреанина врача, с женою и чады, Святым Крещением просветил еси и Троице Святей купно с ними благодарственную воспел еси песнь: Аллилуиа.

Икос 12

Поют ти велия похвалы вси вернии, о великий иерарше Василие, вельми бо на земли до конца жития твоего во славу правоверия потрудився, в Небесная Святая Святых вшел еси, и яко верный Божий служитель, Троице Святей предстал еси, идеже и о нас выну молися, о преблагий отче, верных чадех твоих, с любовию зовущих ти сице:

Радуйся, царское священие, прехвальне Василие; радуйся, Троицы Святыя преукрашенное селение.

Радуйся, чудесными деяньми Царя Небеснаго прославивый; радуйся, ревности своея о славе веры и в болезни смертней не оставивый.

Радуйся, ради обращения неверна чудесное продление себе жития у Бога испросивый; радуйся, своима рукама, возстав с одра смертнаго, Крещением того просветивый.

Радуйся, трудами и мудростию силу зловерия победивый; радуйся, благоверным царем победы на враги испросивый.

Радуйся, апостолом в трудех единонравный; радуйся, со святители Григорием Богословом и Иоанном Златоустом, по повелению твоему, единочестно прославляемый.

Радуйся, нетлением мощей просиявый и славою на небесех увенчанный; радуйся, теплый и великий заступниче, от Бога нам дарованный.

Радуйся, Василие, великий иерарше, Православия всемирный светильниче.

Кондак 13

О пресвятый и великий иерарше Христов Василие, Православия светило и верных ограждение! Призри с небесе на сие, приносимое ти нами, хваление, и молитвами твоими от страстей и бед нас огради, в правей вере соблюди и Царствия Небеснаго сподоби, да купно с тобою и всеми святыми Троице Святей во веки веков поем: Аллилуиа.

[Се́й конда́к глаго́лется три́жды.]
[Далее повторяем 1‑е икос и кондак:]

Икос 1

Ангелов Творец, от века предызбравый тя, преблаженне отче Василие, быти великаго светильника Церкве Своея, ангелоподобна житием яви тя: вельми бо богомыслием и пощеньми в пустыни подвизався, на высоту добродетели восшел еси. Темже, велию на небесех славу стяжавый, приими от нас смиренных, восхваляти тя дерзающих, сия хвалебныя глаголы:

Радуйся, Василие, царствия тезоименитый; радуйся, иерарше Христов великий.

Радуйся, Церкве непоколебимый столпе; радуйся, рода святаго пречестная отрасле.

Радуйся, от юности Царю Небесному всеусердно служивый; радуйся, всею земною, наипаче же небесною, премудростию ум свой обогативый.

Радуйся, купно со другом твоим Григорием Богословом в любомудрии преуспевавый; радуйся, учителя твоего Еввула премудрыми словесы ко Христу обративый.

Радуйся, чистоты и целомудрия предивный хранителю; радуйся, ко спасению верный путеводителю.

Радуйся, душепагубных ересей разорителю; радуйся, богомудрый вселенныя учителю.

Радуйся, Василие, великий иерарше, Православия всемирный светильниче.

Кондак 1

Взбранный Царя Небеснаго служителю и великий Церкве Христовы святителю, правыя веры исповеданием во всем мире просиявый, велие имеяй дерзновение ко Святей Троице, от всяких нас бед ограждай, со умилением тебе вопиющих:

Радуйся, Василие, великий иерарше, Православия всемирный светильниче.

Молитва 1-я

О великий во иерарсех, вселенныя учителю богомудрый, преблаженне отче Василие! Велия подвиги и труды твоя, яже во славу Святыя Церкве совершил еси: ты исповедник твердый и светильник веры Христовы на земли был еси, светом Боговедения верныя озаряяй, ложная учения попаляяй и всему миру слово спасительныя истины возвещаяй. Ныне же, велие на Небесех имеяй дерзновение ко Святей Троице, помози нам, со смирением к тебе припадающим, твердо и неизменно святую Православную веру до конца жития нашего сохранити, от маловерия же, сомнений и колебания в вере соблюди, да не прельщени будем богопротивных и душепагубных учений словесами. Дух ревности святыя, еюже ты пламенел еси, о преславный Церкве Христовы пастырю, возгрей предстательством твоим и в нас, ихже Христос постави быти пастырями, да всеусердно просвещаем и утверждаем в правей вере словесное стадо Христово. Умоли Господа, да возвысится страна наша, и да дарует всему народу нашему здравие, долгоденствие и во всем благое поспешение. Испроси, о милосердый святителю, от Отца светов и всем, всякий дар коемуждо благопотребен: младенцем благое в страсе Божием возрастание, юным целомудрие, старым и немощным укрепление, скорбящим утешение, недугующим исцеление, заблуждшим вразумление и исправление, обидимым заступление, сиротам и вдовицам защищение, искушаемым благодатное поможение, отшедшим от сего временнаго жития отцем и братиям нашим блаженное упокоение. Ей, святче Божий, призри милостиво от обителей Горних на нас, смиренных, многими соблазнами и напастьми обуреваемых, и к земли приверженных возведи к высоте Небесней. Преподаждь нам, преблагий отче, твое архипастырское и святое благословение, да, оным осеняемии, в сие новое лето и во все прочее время живота нашего в мире, покаянии и послушании Святей Православней Церкви поживем, заповеди Христовы усердно творяще, подвигом добрым веры подвизающеся, и тако Царствия Небеснаго достигнем, идеже с тобою и всеми святыми сподоби Троицу Святую, Единосущную и Нераздельную пети и славити во веки веков. Аминь.

Молитва 2-я

О великий и пресвятый святителю отче Василие, преславный Вселенския Церкве учителю, славы Пресвятыя Троицы всеусердный поборниче, Матере Божия и Ея пренепорочнаго девства предызбранный исповедниче, пресветлый чистоты, смирения и терпения образе. Се аз многогрешный и недостойный на высоту небесную взирати, смиренно молю тя, о премудрый Церкве Христовы учителю, научи мя тако богобоязненно житие свое проводити, да никогда же на путь, Божиим повелением противен, уклонюся или совращен буду. Соблюди и избави мя твоим многомощным предстательством от соблазнов мира и козней диавольских, якоже избавил еси от них юношу, от Сладчайшаго Спасителя нашего отступивша и во власть сатаны впадша. Даруй мне силу душевную усердным быти подражателем добродетелей твоих высоких; соделай мя в вере правей тверда и непоколебима, укрепи мя малодушнаго в терпении и уповании на Господа, возгрей в сердце моем истинную Христову любовь, да небесных благ паче всех желаю и ими услаждаюся. Испроси мне у Господа искреннее о гресех сокрушение, да прочее время живота моего в мире, покаянии и исполнении заповедей Христовых провождати буду. Егда же час моего скончания приблизится, ты, о преблагий отче, с Преблагословенною Девою Мариею, тогда ускори на помощь, защити мя от злобных наветов вражиих, и сподоби мя наследника быти райских селений, да купно с тобою и со всеми святыми неприступнаго Божия величества Престолу предстану и Живоначальную, Единосущную же и Нераздельную Троицу прославляю и воспеваю, присно и в безконечныя веки. Аминь.

Молитва 3-я

О великий и преславный святителю Христов, всея вселенския Церкве учителю богомудрый, Православия твердый исповедниче и поборниче, всеблаженне отче Василие! Призри от высот небесных на нас, смиренно к тебе припадающих, и умоли Господа Вседержителя, Егоже верный на земли служитель был еси, да дарует нам веры правыя твердое и неизменное сохранение, Церкви Святей послушание, жития нашего исправление, и во всех нуждах, скорбех и искушениих скорое поможение, терпение же и укрепление. Подаждь нам твое святое благословение, да оным осеняемии, сие новое лето и во вся дни богоугодно в мире и покаянии поживем и во Царствии Небеснем сподобимся купно с тобою и со всеми святыми Живоначальную Троицу воспевати и славити, Отца и Сына и Святаго Духа, во веки веков. Аминь.

Канон святителю Василию Великому

Минея, 1 Января.

Глас 2

Песнь 1

Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Припев: Святи́телю о́тче Васи́лие, моли́ Бо́га о на́с.

Твоему́ гла́су подоба́ше приити́, Васи́лие, нача́ти хотя́щим хвалы́ твоя́,/ но, о́тче, мольбу́ прие́м, благода́ть подава́й незави́стно нам.

Припев: Святи́телю о́тче Васи́лие, моли́ Бо́га о на́с.

Доброде́телей ты жесто́кий ше́ствовал еси́ путь,/ в гла́дкий дости́гл еси́ и несопроти́вный Небе́сный восхо́д/ и всем яви́лся еси́ о́браз, Васи́лие.

Припев: Святи́телю о́тче Васи́лие, моли́ Бо́га о на́с.

Страстно́е взыгра́ние, томя́щее плоть, любому́дрия жела́нием наказа́л еси́,/ те́мже в нетле́нных водворя́ешися Ца́рствиих,/ о́тче Васи́лие.

Припев: Святи́телю о́тче Васи́лие, моли́ Бо́га о на́с.

Душе́вныя стра́сти благопотре́бно, Васи́лие,/ вку́пе же и теле́сныя, духо́вным посе́кл еси́ мече́м,/ себе́ же Влады́це же́ртву прине́сл еси́.

Сла́ва Отцу́ и Сы́ну и Свято́му Ду́ху.

Ты, быв неизрече́нных таи́нник, Васи́лие,/ Христо́ву Ца́рствию тайнонаучи́л еси́, свяще́нне о́тче,/ я́ве Тро́йческий свет облиста́л еси́ нам.

И ны́не и при́сно и во ве́ки веко́в. Ами́нь.

Богородичен: Кто изрещи́ Твое́ по досто́инству возмо́жет, е́же па́че сло́ва зача́тие? Бо́га бо родила́ еси́ пло́тию, Всечи́стая,/ нам я́вльшася Спа́са и Го́спода.

Песнь 3

Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Припев: Святи́телю о́тче Васи́лие, моли́ Бо́га о на́с.

Спритече́ Христо́ву и спросия́ па́мять твоя́, о́тче, Рождеству́,/ Его́же несказа́нное та́инство твои́ми уче́ньми я́ве сотвори́л еси́.

Припев: Святи́телю о́тче Васи́лие, моли́ Бо́га о на́с.

Стра́хом Госпо́дним утвержда́ем, нача́ло бо му́дрости сей есть,/ любо́вию лу́чшею впери́лся еси́ прему́дрости, о Васи́лие.

Припев: Святи́телю о́тче Васи́лие, моли́ Бо́га о на́с.

Наказа́ния быв вся́каго испо́лнен,/ не то́кмо до́льнаго и попира́емаго, мно́го же па́че лу́чшаго,/ показа́лся еси́ ми́ру свет, Васи́лие.

Сла́ва Отцу́ и Сы́ну и Свято́му Ду́ху.

Васи́лие прему́дре, вшел еси́ дея́нием,/ и дея́ние вше́ствие виде́ния Боже́ственнейшаго показа́л еси́,/ и су́щих ра́зуму научи́лся еси́ я́ве.

И ны́не и при́сно и во ве́ки веко́в. Ами́нь.

Богородичен: Безсе́менно во чре́ве Бо́га зачала́ еси́/ и ражда́еши несказа́нно воплоще́нна,/ на Него́же зре́ти не сме́ют, Чи́стая, Небе́сных си́лы, Присноде́во.

Седален, глас 8

Прему́дрости сло́ва навы́к и писа́ние зако́на отложи́в,/ всем пропове́дал еси́ благода́ти сло́во/ и душ скрижа́ли угла́дил еси́ словесы́ твои́ми,/ в ни́хже начерта́л еси́ Боже́ственная уче́ния./ Те́мже и мрак проше́д о́блаком покро́ва телесе́,/ и просия́л еси́ ду́хом, святи́телю Васи́лие./ Моли́ Христа́ Бо́га/ грехо́в оставле́ние пода́ти/ чту́щим любо́вию святу́ю па́мять твою́.

Песнь 4

Ирмос: Услы́шах, Го́споди,/ слух Твоего́ смотре́ния,/ и просла́вих Тя,/ Еди́не Человеколю́бче.

Припев: Святи́телю о́тче Васи́лие, моли́ Бо́га о на́с.

Украша́ется я́коже Рождество́м Христо́ва неве́ста Це́рковь,/ та́ко и па́мятию твое́ю, всеблаже́нне.

Припев: Святи́телю о́тче Васи́лие, моли́ Бо́га о на́с.

Непребори́м яви́лся еси́, по Бо́зе боря́, Васи́лие,/ во всех Того́ повеле́нию покаря́яся.

Припев: Святи́телю о́тче Васи́лие, моли́ Бо́га о на́с.

Це́ркви подаде́ся от Бо́га огражде́ние и стена́ тверда́,/ Васи́лии всеблаже́нне.

Сла́ва Отцу́ и Сы́ну и Свято́му Ду́ху.

Сопротивобо́жным се́чиво ты сека́тельное/ и огнь, пояда́яй пре́лесть, яви́лся еси́, о́тче Васи́лие.

И ны́не и при́сно и во ве́ки веко́в. Ами́нь.

Богородичен: Мо́лим Тя, Чи́стая,/ я́же Бо́га безсе́менно заче́нши,/ при́сно моли́ти за рабы́ Твоя́.

Песнь 5

Ирмос: Све́та Пода́телю/ и веко́в Тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем.

Припев: Святи́телю о́тче Васи́лие, моли́ Бо́га о на́с.

Во́дит вои́стинну сугу́б Це́рковь пра́здник днесь обре́зания,/ я́ко младе́нца Влады́ки, я́вльшагося на земли́,/ и па́мять раба́, му́дра и треблаже́нна.

Припев: Святи́телю о́тче Васи́лие, моли́ Бо́га о на́с.

Непостижи́мый свет почи́в в тебе́, преподо́бне,/ пресве́тлу свещу́ ми́ру тя показа́ Христо́с,/ те́мже па́мять твою́ пое́м, Васи́лие.

Припев: Святи́телю о́тче Васи́лие, моли́ Бо́га о на́с.

Всете́мно напи́санное в Сина́и бытие́ Моисе́ем,/ ты, сказу́я от Боже́ственных сокро́вищ,/ начерта́л еси́ всем, преблаже́нне Васи́лие.

Сла́ва Отцу́ и Сы́ну и Свято́му Ду́ху.

Ни законополо́жник Моисе́й, ни пе́рвее зако́на Ио́сиф бысть,/ и́же по тебе́ пи́щи пшеницоме́ритель:/ Боже́ственныя бо пло́ти сам раздроби́тель яви́лся еси́, Васи́лие.

И ны́не и при́сно и во ве́ки веко́в. Ами́нь.

Богородичен: Тебе́, ро́ждшей Христа́, всех Соде́теля, зове́м:/ ра́дуйся, Чи́стая, ра́дуйся, Свет возсия́вшая нам,/ ра́дуйся, вмести́вшая Бо́га Невмести́маго.

Песнь 6

Ирмос: Бе́здна мя мно́га грехо́вная окружа́ет,/ и вопию́ Ти, проро́ка подража́яй:/ от тли мя, Го́споди, возведи́.

Припев: Святи́телю о́тче Васи́лие, моли́ Бо́га о на́с.

Напита́л еси́ ду́ши, та́ющия гла́дом, ни́щих оби́льно/ и а́лчущих сердца́ вся́каго испо́лнил еси́, Васи́лие, Боже́ственнаго весе́лия.

Припев: Святи́телю о́тче Васи́лие, моли́ Бо́га о на́с.

Напита́л еси́ бога́тно а́лчущия пи́щею Небе́сною:/ хлеб бо А́нгельский есть сло́во твое́, Васи́лие,/ и́мже изря́ден пшеницода́вец был еси́.

Припев: Святи́телю о́тче Васи́лие, моли́ Бо́га о на́с.

Собра́л еси́ пче́льный, Васи́лие, люботру́дно доброде́тели вся́кия цвет/ и, худо́г быв, в ни́хже ублажа́ешися.

Сла́ва Отцу́ и Сы́ну и Свято́му Ду́ху.

Потща́лся еси́ ми́ра отлучи́тися и с Бо́гом пожи́ти,/ те́мже нестоя́тельная и тле́нная, всеблаже́нне Васи́лие, оста́вль,/ пребыва́ющая, я́ко мудр, стяжа́л еси́.

И ны́не и при́сно и во ве́ки веко́в. Ами́нь.

Богородичен: Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,/ я́ко к Неруши́мей Стене́ и Предста́тельству.

Кондак, глас 4

Явился еси́ основа́ние непоколеби́мое Це́ркве,/ подая́ всем некрадо́мое госпо́дьство челове́ком,/ запечатле́я твои́ми веленьми,/ небоявле́нне Васи́лие преподо́бне.

Икос

Целому́дрия ча́ша, уста́ прему́дрости/ и степе́нь уче́ний, Васи́лий Вели́кий всем облиста́ет мы́сленно./ Прииди́те у́бо, и ста́нем в дому́ Бо́жии, те́пле взира́юще,/ чудесы́ сего́ крася́щеся, я́коже луче́ю, облиста́вшеся жития́,/ чи́стым духом прохла́ждшеся,/ подо́бящеся того́ ве́ре, и теплоте́, и смире́нию,/ и́миже дом яви́ся естества́ Бо́жия./ К нему́же вопию́ще, пое́м:/ небоявле́нне Васи́лие преподо́бне.

Песнь 7

Ирмос: О́бразу злато́му, на по́ле Деи́ре служи́му,/ три́е Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Припев: Святи́телю о́тче Васи́лие, моли́ Бо́га о на́с.

О́браз Отца́ Сын, и Сы́на Дух есть./ Ты же Ду́ха, о Васи́лие, нескве́рнено зерца́ло, дом же всея́ Тро́ицы./ Блаже́нна па́мять твоя́, и сла́вящии ю воспрославля́ются.

Припев: Святи́телю о́тче Васи́лие, моли́ Бо́га о на́с.

Углуби́в ум во глубины́ Бо́жия непостижи́мыя/ и собра́в многоце́нный ты би́сер ра́зума,/ напо́лнил еси́ мир прему́дростию и зва́ти научи́л еси́:/ благослове́н еси́, Бо́же оте́ц на́ших.

Припев: Святи́телю о́тче Васи́лие, моли́ Бо́га о на́с.

О, еди́но дохнове́ние ума́ свяще́нных сопру́г,/ я́коже еди́на душа́ во двою́ телесе́х неразде́льно:/ в Григо́рии Васи́лий, жела́нием Боже́ственным совоку́плени, в Васи́лии же Григо́рий,/ ны́не моли́те Христа́ о ста́де ва́шем.

Припев: Святи́телю о́тче Васи́лие, моли́ Бо́га о на́с.

Оте́ц сиро́т, и вдов защи́тник, и бо́гатство ни́щих,/ боля́щих утеше́ние и су́щих в бо́гатстве окормле́ние,/ ста́рости жезл яви́лся еси́, и наказа́ние ю́ности,/ и мона́шествующих доброде́тели пра́вило, Васи́лие.

Сла́ва Отцу́ и Сы́ну и Свято́му Ду́ху.

Очи́стив от вся́каго ти́ннаго скверне́ния ум, Васи́лие,/ сразсмотри́л еси́ духо́вная жела́нным твои́м ду́хом./ Те́мже, воспева́я Тро́ицу, со дерзнове́нием взыва́л еси́:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Тя купину́ Моисе́й в горе́ Сина́йстей огнепали́му, Чи́стая, прови́дяше,/ прие́мшую неопа́льно нестерпи́мую зарю́ Неизглаго́ланнаго Существа́,/ соедини́вшагося дебельству́ пло́ти еди́ныя в Нем святы́х Ипоста́сей.

Песнь 8

Ирмос: Неизрече́нною му́дростью соста́вльшаго вся́ческая Бо́га Сло́ва/ и от не су́щих во е́же бы́ти приве́дшаго,/ благослови́те, дела́, я́ко Го́спода,/ и превозноси́те во вся ве́ки.

Припев: Святи́телю о́тче Васи́лие, моли́ Бо́га о на́с.

Несказа́нным Про́мыслом дарова́вшаго Васи́лия ми́ру,/ свет благоче́стия, трубу́ же Богосло́вия,/ благослови́те, дела́ Госпо́дня, Го́спода.

Припев: Святи́телю о́тче Васи́лие, моли́ Бо́га о на́с.

Бога́тным де́йством все́льшася в му́драго Васи́лия/ и тем благоче́стно Богосло́вившаго,/ благослови́те, дела́ Госпо́дня, Го́спода.

Припев: Святи́телю о́тче Васи́лие, моли́ Бо́га о на́с.

Боже́ственных тво́их слове́с наслади́вшиися, Васи́лие,/ непреста́нно в твое́й па́мяти торжеству́юще, вопие́м:/ благослови́те, дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху.

Лучи́ слове́с испусти́л еси́, Васи́лие, ми́ру,/ све́том наставля́ющия Еди́но чествова́ти Тро́йческое Естество́:/ благослови́те, дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Из Отца́, проше́дшаго пре́жде век, и безле́тнаго Бо́га Сло́ва/ и в после́дняя возсия́вша из Де́вы,/ благослови́те, дела́ Госпо́дня, Го́спода.

Песнь 9

Ирмос: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.

Припев: Святи́телю о́тче Васи́лие, моли́ Бо́га о на́с.

Пе́рваго па́стыря, я́ко овча́ ве́рное Христо́во, Васи́лие,/ живоно́сным стопа́м после́довал еси́,/ мучи́телю бо твою́ ду́шу, о́тче, пре́дал еси́,/ до́блественне предбе́дствуя о Це́ркви, всеблаже́нне.

Припев: Святи́телю о́тче Васи́лие, моли́ Бо́га о на́с.

Церко́вное всесвяще́нное Христо́во ви́дев совокупле́ние,/ твои́м укра́шено святи́тельством, му́дре,/ всегуби́тель, я́ко от гро́ма, треснове́н быв, паде́ся мучи́тель,/ су́щия бо в тебе́ Ду́ха зари́ не стерпе́, Васи́лие.

Припев: Святи́телю о́тче Васи́лие, моли́ Бо́га о на́с.

Апо́столов седа́лища, ли́ка же страда́лец Христо́вых,/ патриа́рхов ски́нии, и пра́ведных сла́дости,/ и ра́дости проро́ков сподо́бился еси́, Васи́лие:/ Богоро́дицы бо служи́тель и Тро́ицы таи́нник был ecи́.

Припев: Святи́телю о́тче Васи́лие, моли́ Бо́га о на́с.

Превы́спренняя вода́ми покрыва́яй Еди́н Госпо́дь,/ востязу́яй мо́ре, бе́здны же изсуша́яй, из Тебе́, Чи́стая, плоть восприе́мый,/ от Вифлее́ма тщи́тся ко Иорда́ну крести́тися пло́тию.

Светилен

Любому́дрия жела́нием обре́зал еси́, о́тче, души́ твоея́ покрыва́ло,/ и ми́ру показа́лся еси́, я́ко со́лнце, чудесы́,/ и ве́рных озари́л еси́ мы́сли, Богому́дре,/ Тро́ицы таи́нниче, о Васи́лие му́дре, и служи́телю Богоро́дицы.